Done Erroman

San Roman (Muxika)

Behe Erdi Aroko elementu finak, herriko ermita batean.

Done Erroman Ermita (Muxika)
  • Kronologia: XV. mendea (1500 aldera)
  • Estiloa: Gotikoa
  • Udala: Muxika
  • Auzoa: San Román
  • Koordenatuak: 43.283673,-2.694034

Lagundu barrualdeari

Ikusi bideoa

Ermita guztiak

Deitura

Erromatar inperioko soldadua izan zen Erroman, 258. urtean kristaua zela adierazteagatik martirizatu zutena. Usadioaren arabera, Done Laurendiren itaunketa eta martirioaren lekukoa izan zen; santu horren sendotasuna eta fedea ikusita, kristautasunera aldatu zen. Done Laurendik berak bataiatu zuen, bere kartzela-gelan. Done Laurendi hil ostean, Erromanek kristaua zela aitortu zuen jendaurrean.

Ebanjelioaren berri ematen hasita, Valeriano enperadoreak mihia moz zezatela agindu zuen. Hala eta guztiz ere, Erromanek eutsi zion; beraz, kartzelaratu eta ito egin zuten.

Bere jaia abuztuaren 9an ospatzen da, Done Laurendiren egunaren bezperan, santu horrek kristautasunera aldatu zuela oroitzeko.

Done Erroman Deitura (Muxika)
Done Erroman Ermita (Muxika)

Ohitura eta Errituak

San Erromanen egunean, abuztuak 9, meza ematen da eta erromeria egiten da.

Antzina, Zeruratzearen (berrogei egun Pazko-domekaren ostean) aurreko astelehenean eta San Markosen egunean, apirilak 25, erreguteak egiten ziren. Egun haietan, prozesioa egiten zen ermitaraino; hor, ura bedeinkatzen zuten, joandakoen baratze eta kortetan ihinztatzeko eta, horrela, zeruaren babesa lortzeko.

Ohikoa zen, halaber, ermita argiztatzeko kandelak edo, behialago, olioa ofrendatzea. Ohitura guzti horiek, ordea, galdu dira.

Eraikina

Ermita muino baten tontorrean dago, Muxikatorretik hurbil. Hasiera batean, auzoko parrokia izan omen zen, baina Done Bikendi Martiriaren eliza egin zutenean ermita izatera murriztu zen. XIII. mendean berriztatu eta 1500 aldera berregin zuten, gaur egun duen itxurarekin.

Ermitak oinplano angeluzuzena, harlangaitz-hormak eta era bi isurkiko teilatua dauka. Burualdeko leiho biak erromanikoaren bukaerakoak omen dira: txaranbelduak dira, erdiko zutabetxoa dute eta, goiko partean, lau petaloko lore-formako apaingarria dute, oso hargintza-lan fina. Gotikoaren bukaerako elementu batzuk ere badaude, hala nola hegoaldeko hormako atea, lojiba-arku arina duena; bere ondoan, ur bedeinkatutarako harrizko ontzia dago.

Barrualdeko pulpitua eta korua galdu dira. Koruaren parean, ermitako oinaldean, jarlekudun leiho bat dago. Gotikoaren bukaerakoa da, bi ojiba-arku txikik osatuta.

Muxikatorretik hurbil dago ermita.
Burualdeko leiho biak erromanikoaren bukaerakoak omen dira.
Hegoaldeko hormako atea gotikoaren bukaerakoa da.
Koruaren parean, ermitako oinaldean, jarlekudun leiho bat dago.

Hornidura

Ermitaren barruan Done Erromanen irudia dago. Tunika berdez jantzita dago, eskumako eskuan liburua eta ezkerrekoan bere martirioaren ikurra den mihi luzea, gurutze batean bukatzen duena, daramatzalarik.

San Erroman irudikatzeko era hori ez da ohikoa; izan ere, soldadu erromatarrez jantzita irudikatu ohi dute. Gotikoaren bukaerako eskultura da, XVI. mendearen hasierakoa, hainbat alditan berpintatu dutena.

Done Erromanen, ermitako patroiaren, irudia, gotikoaren bukaerakoa.

Plaza de La Encarnación 9B
48006 Bilbao
Tel: (34) 944 320 125

Honek diruz lagundua:

Webgunea, hauen laguntzarekin: